ترتيب الدوري الإسباني

 على مدار فترة تألق داني ألفيش في الملاعب بدأ يطلع علينا طبعاً المقارنات بينه وبين بعض الباكات التاريخيين ومن أشهر المقارنات دي والمستمرة حتى يومنا هذا هي مقارنته باللاعب اللي هو كان خليفته في منتخب البرازيل وهو الأسطورة كافو ، من المفارقات في المقارنة دي إن بمجرد سماع إسم كافو الناس مباشرة بتقول لا طبعاً كافو لا يقارن ، مع إن 70% مثلاً من المتابعين الحاليين للكورة مشافوش كافو بشكل دوري أو كدا ، يمكن شافوه في بعض مقاطع اليوتيوب وهو بيشمس باڤيل نيدفيد أو بيعمل أسيستات تاريخية مع الروسونيري ، ندرة من المتابعين فعلاً شافوا كافو في الملعب.. 

لو سألتني عن رأيي الشخصي هقولك بدون تردد إن داني ألفيش هو اللي لا يقارن الحقيقة مش كافو والحاجة الوحيدة اللي ممكن تعلي كفة كافو على داني إنه معاه كاس عالم ، داني ألفيش واحد من أعظم الأظهرة المتوازنة اللي شفتها في حياتي ، في العادة أي ظهير بيكون متميز بشكل كبير في ناحية من الناحيتين الدفاعية أو الهجومية ، بس إنك تلاقي ظهير عنده توازن في الناحيتين بالشكل دا ، بيكون شيء من النوادر.. 

على مستوى الهجوم وحش ، وحش بمعنى الكلمة ، داني ألفيش على مدار مسيرته الكبيرة صانع 150 Assist وهو ظهير ، الرقم دا أعلى من بعض صناع اللعب التاريخيين ، مسجل 54 هدف و 90 % منهم أهداف للتاريخ ، زي هدفه من ركلة حرة في الكوتديڤوار كاس عالم 2010 وزي هدفه الشهير في المقص الأيمن لمرمى إيكر كاسياس من على زاوية ال 18 وغيره وغيره.. 

على مستوى الدفاع فالراجل دا لعب لمدة 8 سنوات كاملة على جبهة أعظم جناح شمال في تاريخ الكورة كريستيانو رونالدو ، ورغم كدا كان خصم صعب المنال جداً في كتير من الأحيان ، بالنسبالي داني ألفيش وضع معايير النجاح في المركز دا ، هو مدرسة في مركز الظهير الأيمن ، عايز تعلم طفل إزاي يكون ظهير أيمن قوي خليه يتابع ڤيديوهات مصغرة لداني ألفيش.. 

بعيداً عن كونه ظهير تاريخي ولاعب مش هييجي زيه في مركزه لسنين طويلة فداني أيضاً "إنسان" بمعنى الكلمة ، في عام 2011 لما تعرض زميله إريك أبيدال لمرض في الكبد داني عرض المساعدة بجزء من كبده لإنقاذ حياة صديقه ، في 2015 تكفل داني ألفيش برعاية 19 طفل من أطفال غينيا بيساو في كافة أشكال الحياة من مأكل وملبس وتعليم وكل شيء ، ومواقف تانية كتير لا يسعنا ذكرها الوقت لذكرها ، خلفيته البسيطة جعلت منه إنسان قبل ما يكون لاعب كبير.. 

عيد ميلاد سعيد داني ، عيد ميلاد سعيد ل اللاعب الأكثر تحقيقاً للألقاب على مدار تاريخ الجلد المدور ⁦♥️⁩..